مباحث، مئی ۲۰۱۱ء

قومی اُمور

سال ۲۰۱۱ ء کی دوسری دو ماہی میں بھی گزشتہ دوماہی کی طرح ریمنڈ ڈیوس کیس ،قانون ناموس رسالت اور اس کے تحفظ کی تحریک کی بحث اہم موضوعات رہے۔  اس کے ساتھ کراچی کی صورتحال، سیاسی جماعتوں کے جوڑ توڑ ، مسلم لیگ نون اور حکمران جماعت کی دوریاں ، یوم پاکستان ، کرکٹ ورلڈ کپ اور مہنگائی جیسے مسائل بھی قابل ذکر رہے۔ البتہ قومی نوعیت کے کچھ مسائل ایسے بھی ہیں جو جرائد کی توجہ حاصل نہ کر سکے جن میں ینگ ڈاکٹرز کی طویل ہڑتا ل اور اس کے باعث عوام کو درپیش مسائل، سندھ حکومت میں تبدیلیاں اور صوبائی وزیر داخلہ ذوالفقار مرزا کی رخصتی، وزیر اعظم کا  کرکٹ ورلڈ کپ کے موقع پر دورہ بھارت، سپریم کورٹ میں ذوالفقار علی بھٹو قتل کیس ریفرنس اور مولانا فضل الرحمٰن پر ہونے والے خود کش حملے شامل  ہیں۔