ٹرانس ہمالیہ ترقیاتی تعاون اور ایک بیلٹ ایک سڑک کی شروعات

انسٹی ٹیوٹ آف پالیسی اسٹڈیز اسلام آباد کے ڈائریکٹر جنرل خالد رحمن نے چین کے صوبے اونان میں منعقدہ دو روزہ کانفرنس میں شرکت کی۔ اس کانفرنس میں شرکت کا دعوت نامہ چین کے ادارے چائنا انسٹی ٹیوٹ آف کنٹیمپوریری انٹرنیشنل ریلیشنز (CICIR) کی جانب سے موصول ہوا۔ ’’ٹرانس ہمالیہ ترقیاتی تعاون اور ایک بیلٹ، ایک سڑک کی شروعات‘‘ کے عنوان سے یہ کانفرنس 25 اور 26 اگست 2015 ء کو چین کے صوبے اونان میں منعقد ہوئی۔ اس کانفرنس کا مقصد ٹرانس ہمالیہ ممالک کو احساسِ شرکت دینا اور اعتماد میں لینا تھا۔ ان ممالک میں چین کے علاوہ بھارت، پاکستان، بنگلہ دیش، نیپال، برما (میانمار) اور افغانستان شامل ہیں۔ کانفرنس میں خطے کے ممالک کے درمیان باہمی رابطوں اور تعاون کے معاملات کو آگے بڑھانے پر بات چیت ہوئی جو کہ چین کی نئی پالیسی ’’ایک بیلٹ، ایک سڑک‘‘ کے تصور کے ساتھ وابستہ ہیں۔